Azərbaycan Dövlət Gənc Tamaşaçılar Teatrında yazıçı Ülviyyə Heydərovanın “İnanıram” monopyesi əsasında eyniadlı tamaşa 21 yanvar tarixində nümayiş olunacaq. Bu haqda bu gün, yanvarın 16-da Bakuplus.az məlumat verir.
Tamaşanın quruluşçu rejissoru və səhnə tərtibatçısı Elşad Rəhimzadə, musiqi tərtibatçısı Aygül Quliyeva, rejissor assistenti Sona Mustafayevadır. Səhnəyə aktrisa Zemfira Əbdülsəmədova çıxacaq.
Gənc qadın dağ kəndində arxeoloji ekspedisiyada iştirak edərkən yamacda tənha ağac görür. O, bu ağacın kölgəsində oturarkən ana olacağını öyrənir. Məhz bu andan sonra qadınla ağac arasında mənəvi əlaqə yaranır. Müharibə səbəbi ilə qadın arxeoloji qazıntıları tərk edir. O, həmişə oğluna işğal altındakı dağın yamacındakı bu ağacı göstərmək istəyirdi.
İllər sonra qadının oğlu anasının çox danışdığı ağacı tanımadan həmin ərazini işğaldan azad edərək dünyasını dəyişdi. Qadının indi bu dünyada yalnız bir sığınacağı var - dağın yamacında tənha ağac. Qadın ağacı sonuncu dəfə görmək üçün azad edilmiş yamaca qayıdır və orada intihar edir.
Tamaşa şəhidlərə və onların analarına həsr olunub.
[URIS id=87052]
