Bakıda təbiət qoynunda yaradılmış plener əsərlərdən ibarət yaradıcılıq sərgisi təşkil olunacaq. Bu haqda bu gün, 5 aprel tarixində Bakuplus.az məlumat verir.
Sərgi Mədəniyyət Nazirliyi, Azərbaycan Rəssamlar İttifaqı, Dövlət Rəsm Qalereyası və Xətai Sənət Mərkəzinin təşkilatçılığı ilə “Heydər Əliyev İli” çərçivəsində baş tutacaq.
Sərgidə iştirak etmək üçün 18 yaşdan yuxarı Azərbaycan və xarici ölkə vətəndaşları mayın 5-dək təqdim edəcəyi əsərin fotosu ilə bərabər, ad və soyadını, əsərin adını, ölçüsünü və texnikasını qeyd etməklə plener2023@gmail.com elektron ünvanına göndərməlidirlər.
Texnika və ölçü sərbəstdir. İştirakçı ən çox 3 əsərlə qatıla bilər, lakin sərgidə 1 və ya 2 əsər nümayiş olunacaq. Seçimlər bədii şura tərəfindən aparılacaq.
Əsərləri nümayiş olunan müəlliflər sertifikatla təltif ediləcəklər. Sərgi Xətai Sənət Mərkəzində keçiriləcək.
