Bakıda 15 yaşlı bacısının 30 yaşlı nişanlısını bıçaqlayaraq öldürməyə cəhddə təqsirləndirilən Araz Səmədovun cinayət işi üzrə məhkəməsi davam etdirilib.
Bakı Ağır Cinayətlər Məhkəməsinin hakimi Fəxri Məmmədovun sədrliyi ilə keçirilən iclasda şahidlər dindirilib.
Məhkəmənin növbəti iclası isə iyulun 7-nə təyin edilib.
Qeyd edək ki, hadisə 2025-ci ilin 28 fevralında Bakının Əmircan qəsəbəsində baş verib.
İstintaqla müəyyən edilib ki, Araz Səmədovun yaşadığı Əmircandakı fərdi yaşayış evinə qardaşının qaynı, həmçinin bacısı Şahmuradova Nəzrin nişanlısı olan Babək Uğurlu qonaq gəlib.
Babəkin yataq otağında bacısı ilə söhbət etməsi Arazı qıcıqlandırıb. O elə bilib ki, Babək bacısına qarşı seksual xarakterli zorakı və əxlaqsız hərəkətlər edib, zorlayıb. Buna görə bacısının nişanlısını öldürmək qərarına gəlib.
Araz Babəkin bədəninin müxtəlif nahiyələrinə ümumilikdə 7 bıçaq zərbəsi endirib.
Babək Uğurlunun yaralı vəziyyətdə aktiv müdafiə olunması, eyni zamanda evdə olan şəxslərin köməyi və vaxtında müdaxiləsi nəticəsində Araz Səmədovun əlindən bıçağı almaq və zərərsizləşdirmək mümkün olub. Bununla da Araz niyyətini başa çatdıra bilməyib və Babəkin həyatı xilas edilib.
Araz Səmədova Cinayət Məcəlləsinin xuliqanlıq niyyəti ilə qəsdən adam öldürməyə cəhd və xüsusi amansızlıqla və ya ümumi təhlükəli üsulla adam öldürməyə cəhd maddələrilə ittiham irəli sürülüb.
Mənbə: unikal.az
