Maştağa Bakının ən qədim və böyük yaşayış məskənlərindən biridir. Əvvəllər kənd statusuna malik Maştağa sonradan qəsəbəyə çevrilib. Ərazisi 6 min hektara qədərdir. Buradakı memarlıq abidələri ilə qədimliyin təsdiqləyicisidir. Maştağada vaxtilə 27 hamam, 21 ovdan, müdafiə qalası, 20 məscid olub. Hətta məhəllələrdən birində 5 məscid, 7 hamam, 5 ovdan varmış.
"Maştağa" sözünün mənasına gəldikdə… Görkəmli Azərbaycan tarixçisi Abbasqulu Ağa Bakıxanov "Gülüstan-i İrəm" əsərində "Maştağa" toponiminin "massaget" sözündən yaranması fikrini irəli sürüb. Azərbaycan xalqının soykökündə mühüm rol oynayan bu tayfa eramızdan əvvəl VI-V əsrlərdə mövcud olub. "Maştağa" toponiminin digər mənasını da Abbasqulu ağa Bakıxanov "Gülüstani-İrəm" əsərində "Məşədi ağa" ilə əlaqələndirib.
Bəzi məlumatlara görə, Bakı xanı Mirzə Məhəmməd Xan vaxtilə burada möhtəşəm bir qala tikdiribmiş. Ancaq ötən əsrin 20-ci illərində bu qala dağıdılıb.
Deyilənə görə, kəndin ətrafında aparılan qazıntılar zamanı mis sikkələr aşkar edilib. Bu da yaşayış məskəninin qədim tarixə malik olmasının daha bir göstəricisidir. Təəssüf ki, yadelli işğalçıların basqınına məruz qalan Maştağa dəfələrlə dağıdılıb, tarixi abidələr yerlə yeksan edilib.
Hazırda Maştağada 50 mindən çox adam yaşayır.
