Bakıda iki il ərzində arvadına ağır işgəncələr verən şəxsin məhkəməsi başa çatıb.
42 yaşlı Bakı sakini Ayaz müxtəlif vaxtlarda həyat yoldaşı Qənirəni mütəmadi döyüb, bədəninə qaynar su töküb və qızdırılmış dəmirlə damğalayıb. Ağır fiziki ağrılara dözməyən və barmaqları sındırılan qadın sonda polisə şikayət edib.
Hadisə Sabunçu rayonu ərazisində baş verib. Qadına qarşı törədilən amansız zorakılıq faktları ilə bağlı ərinə qarşı müvafiq maddə ilə ittiham irəli sürülüb.
Məhkəmə iclasında ifadə verən təqsirləndirilən şəxs əməlini tam etiraf edib və günahını boynuna alıb. O, zərərçəkmişlə artıq barışdığını bildirərək işə xitam verilməsini istəyib. Zərərçəkmiş qadın da öz növbəsində ərini bağışladığını və şikayətçi olmadığını bəyan edib.
Sabunçu Rayon Məhkəməsinin qərarı ilə tərəflərin barışması əsas götürülüb. Təqsirləndirilən şəxs cinayət məsuliyyətindən azad edilib və cinayət işinə xitam verilib. Onun barəsində tətbiq edilən polisin nəzarəti altına vermə qətimkan tədbiri də ləğv olunub.
Mənbə: demokrat.аz
