Abşeron rayonunda 46 yaşlı kişi həyat yoldaşını qanunsuz azadlıqdan məhrum etməkdə ittiham olunub.
İstintaqla müəyyən edilib ki, ailə Bakının Qobu qəsəbəsində yaşayıb. Xəlil (ad şərtidir) evə quraşdırdığı gizli müşahidə kamerası vasitəsilə həyat yoldaşı Ləmanın (ad şərtidir) mobil telefonunda "Xena" proqramı üzərindən qrup şəklində tanımadığı şəxslərlə ünsiyyət saxladığını görüb. Qısqanclıq zəminində mağazadan zəncir və iki qıfıl alaraq evə gəlib, qadını döyüb və çarpayının dəmir hissəsinə zəncirlə bağlayıb.
Ləman təxminən 5 saat zəncirli vəziyyətdə qalıb, yalnız iki dəfə ayaqyoluna getməsi üçün açılıb. Xəlil məhkəmədə ifadəsində polis əməkdaşlarının evə gəldiyini yenə də müşahidə kamerasından gördüyünü, bundan sonra qadını açaraq ondan şikayət etməməsini xahiş etdiyini bildirib.
Zərərçəkmiş Ləman da ifadəsində baş verənləri təsdiqləyib və polis gələndən sonra ərinin zənciri açdığını deyib.
Abşeron Rayon Məhkəməsinin hökmü ilə Xəlilin barəsində amnistiya aktı tətbiq edilib. O, cinayət məsuliyyətindən azad olunub və iş üzrə icraata xitam verilib.
mənbə: demokrat.az
