"Arzum 9999" ləqəbli tiktoker İlduzə Hacıyevanın paytaxtın Xəzər rayonunda ölümlə nəticələnən yol-nəqliyyat hadisəsi ilə bağlı cinayət işi üzrə çıxarılan hökm sosial şəbəkələrdə geniş müzakirə olunur.
Bakuplus.az xəbər verir ki, bununla bağlı Bakı şəhəri Xəzər Rayon Məhkəməsinin media ilə əlaqələrə məsul şəxsi, hakim Ramilə Xəzri açıqlama verib. O bildirib ki, İlduzə Hacıyeva 27 iyun 2025-ci ildə Mərdəkan–Qala yolunda idarə etdiyi "Changan Qiyuan A05 Plug-in Hibrid" markalı avtomobillə hərəkət edərkən "Yol hərəkəti haqqında" Qanunun tələblərini pozub və Amal Məlikovun idarə etdiyi "Mercedes-Benz D2" markalı avtomobilin arxa təkərinə dəyərək qəza törədib.
Nəticədə "Mercedes-Benz" markalı avtomobil beton maneəyə çırpılıb, sürücü Amal Məlikov ölüb, sərnişin Sənubər Muradova isə ağır bədən xəsarəti alıb. İlduzə Hacıyeva hadisədən sonra hüquq-mühafizə orqanlarına məlumat vermədən hadisə yerindən uzaqlaşıb və daha sonra Almaniyaya gedib.
Ona Cinayət Məcəlləsinin 263.2 və 264-cü maddələri ilə ittiham irəli sürülüb. Məhkəmə araşdırması zamanı ekspert rəyi ilə müəyyən olunub ki, İlduzə Hacıyeva yol hərəkəti qaydalarına əməl etsəydi, hadisənin qarşısını almaq üçün texniki imkanı olub.
Dövlət ittihamçısı onun 5 il 9 ay müddətinə azadlıqdan məhrum edilməsini istəyib. Məhkəmə isə hadisə yerindən qaçmasını, zərərçəkmişlərlə barışığın olmamasını və himayəsində yetkinlik yaşına çatmayan uşaqlarının olmasını nəzərə alaraq ona 5 il 2 ay müddətinə azadlıqdan məhrumetmə cəzası təyin edib.
Hakim bildirib ki, tərəflər hökmdən qanunvericilikdə nəzərdə tutulmuş qaydada apellyasiya şikayəti verə bilərlər.
