Abşeron rayonunun Masazır kəndinin bir hissəsində bu gün səhər saatlarından işıq kəsilib.
Bakuplus.az -a müraciət edən sakinlərin iddiasına görə, elektrik enerjisinin kəsintiləri son zamanlar mütəmadi xarakter alıb:
"Demək olar ki, həftəiçi hər gün işıqlarımız sönür. Niyazi, Rafiq Dünyamalıyev, Hüseyn Cavid, Şəhid Zaur Dövlətov küçələrində yaşayanlar artıq təngə gəliblər. Belə də qəddarlıq olar? Yaşlı var, körpə var, xəstə var! Bu gün də səhər 8-də söndürüblər. Nə soyuducu işlədə bilirik, nə kondisioner. Görəsən, "Azərişıq" heç utanmır? Ayda bir dəfə də mətbuatda xəbər yayır ki, bəs işıqları söndürürük ki, əhalini daha keyfiyyətli elektrik enerjisi ilə təchiz edək. Ayıb olsun, "Azərişıq"! Keyfiyyət budur?"
Şikayətçilər bildirirlər ki, "Azərişıq" ASC-nin "199" Çağrı Mərkəzinə dəfələrlə müraciət etsələr də, heç bir nəticə olmayıb.
Masazır sakinləri "Azərişıq" ASC-nin məsul şəxslərinə müraciət edərək yaranmış bu biabırçı vəziyyətin qısa zamanda aradan qaldırılmasını, əhalinin elektrik enerjisi ilə fasiləsiz təminatını bərpa edilməsini tələb edir.
Məsələ ilə bağlı "Azərişıq" ASC-yə sorğu göndərilib.
