Bir müddət əvvəl Almaniyanın Federal Xarici İşlər Nazirliyinin “Mədəni irsin qorunması” proqramı çərçivəsində qrantın verilməsi haqqında müqavilə imzalanıb. Müqaviləni İçərişəhər Muzey Mərkəzinin direktoru Əminə Məlikova və Almaniyanın Azərbaycandakı fövqəladə və səlahiyyətli səfiri Ralf Horleman imzalayıblar. Bu haqda bu gün, 14 oktyabr tarixində “İçərişəhər” Dövlət Tarix-Memarlıq Qoruğu İdarəsi məlumat verib.
Bu qrant Azərbaycanda ilk dəfə olaraq şüşə neqativlərin, 19-cu əsrin sonu və 20-ci əsrin əvvəllərinə aid nadir fotoşəkillərin bərpası, çapı, rəqəmsallaşdırılması, o cümlədən elektron formata salınması istiqamətində mühüm işləri özündə əks etdirən layihənin həyata keçirilməsinə imkan verir.
“İçərişəhər” Dövlət Tarix-Memarlıq Qoruğu İdarəsinin nəzdində fəaliyyət göstərən “İçərişəhər” Muzey Mərkəzinin fondunda Bakının özünün, İçərişəhərin, Qarabağın və Azərbaycanın digər bölgələrinin mənzərələrini əks etdirən nadir fotoşəkillər və neqativlər toplanıb. Bu saxlama vahidlərinin əksəriyyəti Aleksandr Mişon, İsaak Rubençik, Hüseyn Hüseynzadə, Yuri Raxil, Yuri Şamilov və digər məşhur fotoqraflara məxsusdur.
[caption id="attachment_74722" align="alignnone" width="896"]
Foto “İçərişəhər” Dövlət Tarix Memarlıq Qoruğu İdarəsinin rəsmi İnstagram səhifəsi[/caption]
