Ali Məhkəmədə Bakıda Səbuhi Əhmədlinin qətli ilə bağlı məhkum olunan Əli Eybatov, Fərrux Qasımov və Emin Ələsgərov barəsində verilmiş kassasiya protesti və kassasiya şikayətinə baxılıb.
Hakim Nazim Mövsümovun sədrliyi ilə keçirilən prosesdə dövlət ittihamçısının kassasiya protesti və zərərçəkmişin hüquqi varisinin nümayəndəsinin kassasiya şikayəti təmin edilməyib. Bununla da Bakı Apellyasiya Məhkəməsinin qərarı qüvvədə saxlanılıb.
Xatırladaq ki, hadisə 2024-cü il martın 9-da Sabunçunun Bakıxanov qəsəbəsində baş verib. İstintaqa əsasən, şəxsi münasibətlər zəminində yaranan mübahisə zamanı Səbuhi Əhmədli qətlə yetirilib.
Apellyasiya Məhkəməsinin qərarı ilə Əli Eybatovun cəzası 18 ildən 15 ilə endirilib. Fərrux Qasımov qətl ittihamı üzrə bəraət alaraq xuliqanlıq maddəsi ilə 3 il, Emin Ələsgərov isə amnistiya tətbiq edildikdən sonra 2 il 4 ay müddətinə azadlıqdan məhrum edilib. Dövlət ittihamçısı və zərərçəkmiş tərəf bu qərardan kassasiya şikayəti versə də, Ali Məhkəmə onların müraciətlərini təmin etməyib.
Qeyd edək ki, Emin Ələsgərov "Silk Way" MMC-də yanğından mühafizə sistemləri üzrə sahə rəisi işləyib, Fərrux Qasımov isə Texnika və Texnologiyalar üzrə Bakı Dövlət Peşə Təhsil Mərkəzində fiziki tərbiyə müəllimi vəzifəsində çalışıb.
mənbə: pravda.az
