Oğurluqda təqsirləndirilən Elnur Quliyevin cinayət işi üzrə məhkəmə prosesi başa çatıb.
Pravda.az-a xəbər verir ki, hadisə 2025-ci ildə Bakı şəhərinin Binəqədi rayonu, Biləcəri qəsəbəsində yerləşən fərdi yaşayış evində baş verib.
Belə ki, əvvəllər Elnur Quliyevin həyat yoldaşı zərərçəkmiş Şəhriyar Əsədovun uşaqlarının dayəsi olub. Təqsirləndirilən şəxs ev sahibinin evdə olmadığı vaxtdan istifadə etmək qərarına gəlib.
Hadisə günü o, zərərçəkmiş şəxsə məxsus yaşayış evin yaxınlığına gələrək əvvəlcədən bildiyi yerdə saxlanılan açarı əldə edib və evə daxil olub. Elnur yataq otağındakı dolabdan qızıl dəsti, qızıl üzük, qızıl sırğa və boyunbağı götürüb.
Ev sahibi evinə qayıdarkən qızıl əşyalarının yerində olmadığını görüb.
Bundan sonra hüquq-mühafizə orqanlarına müraciət olunub və hadisə ilə bağlı araşdırmalara başlanılıb.
Binəqədi Rayon Məhkəməsində hakim Elçin Ağayevin sədrliyi ilə keçirilən son iclasda hökm oxunub, təqsirləndirilən şəxs, 1 il 11 ay 27 gün müddətinə azadlıqdan məhrum edilib.
Qeyd edək ki, ad və soyadlar şərti verilib.
