Ağstafa - Bakı qatarında gecikmə yaşanıb.
Bakuplus.az-ın məlumatına görə, iyunun 14-ü saat 22:40 radələrində elektrik enerjisinin verilişində yaranan problem səbəbindən qatar Qaradağ rayonunun Qarakosa qəsəbəsi yaxınlığında dayanıb. Saat 23:00 radələrində yenidən hərəkətə başlasa da, marşrut boyunca daha bir neçə dəfə dayanmalı olub.
Qatarın cədvələ əsasən saat 23:44-də Bakı Beynəlxalq Vağzalına çatması nəzərdə tutulsa da, həmin vaxt o, Səngəçal stansiyasında olub.
Nəticədə sərnişinlər təyinat məntəqəsinə gecikmə ilə çatdırılıblar. Qatar gecə saat 00:55 radələrində stansiyaya daxil olub. Bildirilir ki, yaranmış narahatlığa görə üzrxahlıq məqsədilə sərnişinlərə şirniyyat paylanıb.
Həmçinin sərnişinlərin mənzil başına çatdırılması üçün qrafikdənkənar Bakı–Sumqayıt və Bakı–Xırdalan sürət qatarları, eləcə də avtobus reysləri təşkil olunub.
Məsələ ilə bağlı Bakuplus.az "Azərbaycan Dəmir Yolları" QSC-yə sorğu ünvanlayıb. Qurumdan sorğuya cavab olaraq bildirilib ki, 14 iyunda axşam saatlarında Hacıqabul-Pirsaat sahəsində dartı yarımstansiyasını ildırım vurması nəticəsində elektrik xəttində gərginlik olmadığından Ağstafa-Bakı və Qəbələ-Bakı qatarlarının hərəkətində fasilə yaranıb:
"Operativ olaraq əraziyə teplovozlar göndərilib və qatarların Bakıya çatdırılması təmin edilib. Qatarların gecikməsini nəzərə alaraq sərnişinlərin mənzil başına rahat çatdırılması üçün Bakı Dəmiryol Vağzalının yaxınlığından şəhərin 4 müxtəlif istiqamətinə avtobuslar və 2 istiqamətdə qatar reysləri təyin edilib. Narahatlığa görə sərnişinlərimizdən üzr istəyir, anlayışa görə təşəkkür edirik".
