"Ə, mənə niyə deyirsiz? Mən kiməm? Şofer! Gedin rəhbərliyin yaxasından yapışın!"
Bu, sərnişinlərin kondisionerin işləməməsinə görə iradlarından bezən 500 nömrəli avtobus sürücüsünün hayqırtısı idi. Biz də sürücünün xahişini yerə salmırıq. Üzümüzü "Bakubus" MMC-nin rəhbərliyinə tutub deyirik: "Camaata niyə zülm edirsiniz, cənablar? Axı biz isti yay günlərində dar salonlarda boğuluruq! Xüsusən də Sumqayıt və Saray istiqamətində hərəkət edən 500, 503 və 508 nömrəli marşrutlarda vəziyyət olduqca acınacaqlıdır".
Əslində, bu problem barədə dəfələrlə deyilib, yazılıb. Amma nə sirri-xudadırsa, "Bakubus"un yüksək vəzifəliləri bizi eşitmir ki, eşitmir. Səbəbini bilmirik. Bəlkə sutkanın çox hissəsini yatırlar? Ya bəlkə eşitmək və görməkdə problemləri var? Ya, Allah eləməmiş, xidməti avtomobilləri sıradan çıxıb və onlar da "qara millət" kimi "Bakubus" avtobuslarına minmək məcburiyyətində qalıblar, sonra da havasızlıqdan elə oradaca bayılıblar? Hər halda biz bəxtimizi bir daha sınadıq. Dərdimizi dedik. Ümid edirik ki, heç olmasa bu dəfə səsimiz "Bakubus"un laqeydlik ümmanında qərq olmayacaq.
Kamran Rza
