Ötən gün Sabunçu rayonunun Bilgəh qəsəbəsində yerləşən, "Daçnik" kimi tanınan nəzarətsiz ərazidə və küləkli hava şəraitində sudabatma hadisəsi baş verib.
Bakuplus.az xəbər verir ki, bu barədə Fövqəladə Hallar Nazirliyinin (FHN) yaydığı müraciətdə bildirilib.
Qeyd edilib ki, bu hadisə qaydalara riayət etməyin vacibliyini bir daha göstərir: "Aparılan geniş maarifləndirmə işlərinə və küləkli hava şəraitində, eləcə də qeyri-çimərlik ərazilərində çimməyin təhlükələri barədə edilən çoxsaylı xəbərdarlıqlara baxmayaraq, bəzi vətəndaşların təhlükəsizlik qaydalarına laqeyd yanaşması ağır nəticələrə səbəb olur".
FHN vətəndaşları küləkli havada dənizə girməməyə, qeyri-çimərlik ərazilərində çimməməyə və xilasedicilərin çağırış və tələblərinə sözsüz əməl etməyə çağırıb.
"Unutmayın: Qaydalara biganəlik həyatımıza təhlükədir!", – deyə müraciətdə vurğulanıb.
Nazirlik xatırladıb ki, təhlükə zamanı 112 qaynar xəttinə zəng etmək lazımdır.
