Binəqədi rayonu ərazisində yerləşən “Corce” parkı təmir olunaraq sakinlərin istifadəsinə verilib. Bu haqda 12 yanvar tarixində Realtv məlumat verib.
Cəfər Xəndan küçəsi ilə Azadlıq prospekti kəsişməsində yerləşən 2006-ci ildə rumın bəstəkarı Corce Eneskunun xatirəsinə salınan park yenidən qurularaq rayon sakinlərinin istifadəsinə verilib.
Parkda vətəndaşların istirahət və asudə vaxtlarının təşkili üçün müxtəlif infrastruktur yaradılıb. Burada 600 kv.m. sahədə gənclərin asudə vaxtının səmərəli təşkili üçün skeyt meydançası, fiziki məhdudiyyətli şəxslər üçün idman qurğuları quraşdırılıb.
Bir hektar sahəni əhatə edən parkda həyata keçirilən yenidənqurma işləri çərçivəsində əraziyə 2025 kv.m. tamet və 460 kv.m. asfalt, 430 metr mərmər döşənib. İstirahət güşəsinin ərazisində 15 ədəd oturacaq, 10 ədəd zibil qutuları, 6 ədəd uşaq əyləncə elementləri, 14 ədəd işıq dirəyi quraşdırılıb, müxtəlif növ ağaclar əkilib.
