27 avqust məşhur aktyor Məmmədkamal Kazımovun doğum günüdür.
O, 27 avqust 1929-cu ildə Bakıda anadan olub. Erkən yaşlarından teatr sənətinə maraq göstərən Kazımov 1944-cü ildə Azərbaycan Dövlət Akademik Milli Dram Teatrına qəbul olunub və teatrın nəzdindəki studiyada təhsil alıb. Daha sonra Azərbaycan Dövlət Teatr İnstitutunun dram və kino aktyorluğu, eləcə də rejissorluq fakültələrində təhsil alıb.
Məmmədkamal Kazımov uzun illər teatr və kino sahəsində fəaliyyət göstərib. Aktyor kimi "Bir cənub şəhərində", "Yol əhvalatı", "Qətl günü", "Ölülər", "Ümid", "Mənim ağ şəhərim", "Şahid qız", "Güllələnmə təxirə salınır" və "Qara Volqa" kimi filmlərdə çəkilib. Xüsusilə epizodik rollarda yaratdığı obrazlarla tamaşaçıların yaddaşında iz qoyub.
Məmmədkamal Kazımov ömrünün son illərində pedaqoji fəaliyyətlə də məşğul olub, gənc aktyorların yetişməsinə töhfə verib. 61 illik sənət fəaliyyəti ərzində Azərbaycan teatr və kino mədəniyyətinə mühüm töhfələr verən sənətkar 13 dekabr 2005-ci ildə vəfat edib.
