14 il ərzində həyat yoldaşı tərəfindən davamlı fiziki və psixoloji zorakılığa məruz qaldığını bildirən qadın iki gün əvvəl övladları ilə birlikdə "Təmiz Dünya" Qadınlara Yardım İctimai Birliyinin sığınacağına yerləşdirilib.
Bakuplus.az xəbər verir ki, bu barədə "Təmiz Dünya" Qadınlara Yardım İctimai Birliyinin sədri Mehriban Zeynalova şəxsi sosial media hesabında bildirib.
Zərərçəkmiş qadının sözlərinə görə, uşaqların səs salması, ən xırda məişət məsələləri, hətta "niyə mənə belə baxdın?" kimi səbəblər həyat yoldaşının onu döyməsi üçün bəhanəyə çevrilib. Sonuncu dəfə ağır zorakılığa məruz qalanda huşunu itirib, qonşular isə ürək masajı edərək onu həyata qaytarmağa çalışıblar.
"Təmiz Dünya"nın sədri Mehriban Zeynalova bildirib ki, qadın sığınacağa gətirilən zaman həm fiziki, həm də psixoloji vəziyyəti çox ağır olub. Onun sözlərinə görə, qadının yaxınları da dəfələrlə təhdid və zorakılıqla üzləşiblər. Qadının iddiasına əsasən, həyat yoldaşı hətta atasının üzərinə balta ilə gedib, anasına isə xəsarət yetirib.
Mehriban Zeynalova qeyd edib ki, müraciətdən dərhal sonra hüquq-mühafizə orqanları araşdırmaya başlayıb və qadının həyat yoldaşı saxlanılıb. Hazırda faktla bağlı ekspertiza təyin edilib, araşdırmalar davam etdirilir.
