Bakının Xəzər rayonunda ər qısqanclıq zəminində yaranan mübahisə zamanı arvadını döyüb.
Hadisə rayonun Binə qəsəbəsində baş verib. Şərur rayon sakini, 1985-ci il təvəllüdlü Süleyman birgə yaşadıqları evdə həyat yoldaşı Zəhra ilə (adlar şərtidir – red.) mübahisə edib.
Mübahisəyə səbəb Zəhranın ərindən gizli mobil telefondan istifadə etməsi və həmin telefona şübhəli SMS-in gəlməsi olub.
Həmin mesajı görən Süleyman münaqişə zamanı əli ilə arvadının bədəninin müxtəlif nahiyələrinə qəsdən zərbələr endirərək ona xəsarətlər yetirib.
Faktla bağlı Süleyman barəsində Cinayət Məcəlləsinin 128-ci (qəsdən sağlamlığa yüngül zərər vurma) maddəsi ilə ittiham irəli sürülüb.
Təqsirləndirilən şəxs ona verilən ittiham üzrə özünü təqsirli bilib. O, ifadəsində zərərçəkmiş şəxslə barışdığını və ona dəymiş ziyanı ödədiyini bildirib.
Zərərçəkmiş şəxs də ifadəsində əri ilə barışdığını təsdiqləyib. O, ərinə qarşı heç bir şikayət və tələbinin olmadığını deyib.
Xəzər Rayon Məhkəməsinin hökmü ilə təqsirləndirilən şəxsin barəsində olan cinayət işi üzrə icraata xitam verilib və o, cinayət məsuliyyətindən azad edilib.
mənbə: demokrat.az
