Bakı şəhərində bir neçə zərərçəkmişə qarşı xüsusilə "işə düzəltmə" və "rəsmi əlaqələrdən istifadə" vədləri ilə həyata keçirildiyi iddia olunan dələduzluq əməlləri üzrə məhkəmə prosesi yekunlaşıb.
İttiham aktına əsasən, təqsirləndirilən şəxs özünü yüksək vəzifələrdə çalışan tanışları və geniş əlaqələri olan şəxs kimi təqdim edərək müxtəlif vətəndaşların etibarını qazanıb və onlardan müxtəlif məbləğlərdə pul əldə edib.
İş materiallarında diqqət çəkən epizodlardan biri Odlar Yurdu Universiteti ilə bağlıdır.
İttihama görə, təqsirləndirilən şəxs zərərçəkmişlərə özünü dövlət qurumlarında və nüfuzlu çevrələrdə əlaqələri olan şəxs kimi təqdim edərək Odlar Yurdu Universitetində kargüzar və digər vəzifələrə işə düzəltmə vədi verib.
Odlar Yurdu Universitetinin sahibi keçmiş deputat Əhməd Vəliyevdir.
Təqsirləndirilən şəxsin zərərçəkmişlərdən ümumilikdə 10 500 manatadək vəsait aldığı bildirilir.
Məhkəmə təqsirləndirilən şəxsin əməlini Cinayət Məcəlləsinin 178.2.2 və 178.2.4-cü maddələri (təkrar və xeyli miqdarda dələduzluq) ilə tövsif edib.
Hökmə əsasən, ona 3 il 3 ay müddətinə azadlıqdan məhrumetmə cəzası təyin olunub. Daha sonra həbsdə saxlanıldığı müddət nəzərə alınmaqla cəza 2 il 6 ay 2 gün olaraq qəti müəyyən edilib.
Mənbə: qaynarinfo.az
