Bakının Yasamal rayonunda 47 yaşlı kişi keçmiş həyat yoldaşına xəsarət yetirib.
Teleqraf.az-ın əldə etdiyi xəbərə görə, hadisə ötən ilin noyabrın 7-də baş verib.
Şəki şəhər sakini, 1978-ci il təvəllüdlü Nazim həmin gün saat 10:00 radələrində keçmiş həyat yoldaşı Zahirə (adlar şərtidir – red.) ilə birgə mülkiyyətlərində olan mənzilin satılmasına etiraz səbəbindən mübahisə edib.
Mübahisə zamanı o, plastik küt əşya ilə keçmiş arvadını vurub, ona müxtəlif dərəcəli xəsarətlər yetirib.
Hadisəni törədən Nazimin barəsində Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham elan edilib.
İş üzrə izahat verən keçmiş ər ittiham üzrə özünü təqsirli bilib. Bildirib ki, noyabrın 7-də saat 10:00-da keçmiş həyat yoldaşı ilə aralarında barışmaq üstündə mübahisə yaranıb. Nazim deyib ki, keçmiş həyat yoldaşı onun yeni qurduğu ailənin üzvlərinin ünvanına nalayıq sözlər işlədib. Bundan sonra Nazim Zahirəyə şillə vurub, zərbələr endirib, saçından tutaraq yerə yıxıb.
İş üzrə zərərçəkmiş qismində ifadə verən Zahirənin sözlərinə görə, mübahisə məhkəmə qərarı əsasında bölünmüş mənzilin satılmasına görə baş verib.
Zərərçəkmiş şəxs keçmiş ərinə ağır cəza verilməsini xahiş edib.
Bu cinayət işinə Yasamal Rayon Məhkəməsində baxılıb. Nazim 6 ay müddətinə azadlığın məhdudlaşdırılması cəzasına məhkum edilib.
Ona Bakı və Sumqayıt şəhərlərinin, Abşeron rayonunun inzibati ərazilərini tərk etməsi cəza çəkdiyi müddətdə qadağan olunub.
