Abşeron Rayon Məhkəməsində qəsdən sağlamlığa yüngül zərər vurmada təqsirləndirilən Ömər Cəfərovun cinayət işi üzrə məhkəmə istintaqı yekunlaşıb.
Hakim Vaqif Həsənovun sədrliyi ilə keçirilən prosesdə hökm oxunub.
İttihama görə, Ömər Cəfərov birlikdə yaşadqları evdə həyat yoldaşı, zərərçəkmiş Mənsumə Cəfərova ilə mübahisə edib. Mübahisəyə səbəb qadının evdə yemək hazırlamaması ilə bağlı ərinin ona irad bildirməsi olub.
Bu zaman təqsirləndirilən şəxs əsəbiləşərək həyat yoldaşının üzərinə hücum edib və əvvəlcə onun sifət nahiyəsinə əl ilə zərbə endirib. Daha sonra Ömər Mənsumənin əlində olan "Redmi Note 13" markalı mobil telefonu alaraq həmin telefonla onun sağ qoluna vurub.
Məhkəmə-tibbi ekspertizasının rəyinə əsasən, həmin xəsarətlər sağlamlığın qısa müddətə pozulmasına səbəb olan yüngül dərəcəli bədən xəsarəti kimi qiymətləndirilib.
Ömər Cəfərov qəsdən sağlamlığa yüngül zərər vurma cinayət əməlini törətməkdə təqsirləndirilib.
Məhkəmə hazırlıq iclasında Ömər Cəfərov özünü təqsirli bilib.
Mənsumə Cəfərova isə verdiyi ifadəsində təqsirləndirilən şəxslə barışdığını, ona qarşı heç bir şikayət və tələbinin olmadığını, cinayət işinə bəraətverici əsaslar olmadan xitam verilməsini xahiş etdiyini bildirib.
Məhkəmənin yekun qərarı ilə cinayət işi üzrə icraata xitam verilib və Ömər Cəfərov cinayət məsuliyyətindən azad edilib.
Qeyd edək, ad və soyadlar şərti verilib.
Mənbə: pravda.аz
