Paytaxtın Xətai rayonu, M.Hadi küçəsində sakinlərin narazılığına səbəb olan neqativ hal polis əməkdaşları tərəfindən aradan qaldırılıb.
Əldə etdiyimiz məlumata görə, qeyd olunan ərazidə piyadaların hərəkətini çətinləşdirən, qanunsuz küçə ticarəti ilə məşğul olan şəxslər barəsində İnzibati Xətalar Məcəlləsinin müvafiq maddəsinə uyğun olaraq tədbirlər görülüb.
Qeyd edək ki, dünən sakinlər "Əhmədli" metrostansiyasının 3-cü çıxışında səkilərin və keçid yollarının zəbt edilməsi barədə Bakuplus.az-a şikayət etmişdilər. Onlar bildirmişdi ki, xüsusilə axşam saatlarında, insanların sıx hərəkət etdiyi vaxtda səkilərdən keçmək qeyri-mümkün olur.
***
"Əhmədli" metrostansiyasının 3-cü çıxışında - piyada keçidinin və səkinin ətrafında - qanunsuz küçə alverçiləri səkiləri və keçid yollarını tamamilə zəbt ediblər".
Bununla bağlı Bakuplus.az-a həmin ərazidə yaşayan sakinlər şikayət ünvanlayıblar.
Onlar bildirir ki, xüsusilə axşam saatlarında, insanların sıx hərəkət etdiyi vaxtda səkilərdən keçmək qeyri-mümkün olur:
"Sakinlər ticarət mallarının arasından keçə bilmədikləri üçün məcburiyyət qarşısında qalaraq alternativ ara küçələrlə hərəkət etməli olurlar. Mövzu ilə bağlı müvafiq qurumlara dəfələrlə müraciət etmişik, lakin görülən tədbirlər müvəqqəti xarakter daşıyıb. Nəzarət dayandırıldıqdan 1 həftə sonra vəziyyət yenidən əvvəlki halına qayıdır".
