"Melissa ASP" MTK-nın sakinləri liftlərin tez-tez sıradan çıxması ilə bağlı Bakuplus.az redaksiyasına müraciət ediblər.
Sakinlərin sözlərinə görə, hazırda yaşayış kompleksinin 9-cu blokunda yük lifti işləmir. Söhbət 19 mərtəbəli, hər mərtəbəsində yeddi mənzilin yerləşdiyi blokdan gedir.
Şikayətçilər bildirirlər ki, MTK rəhbərliyi problemdən xəbərdardır, lakin lift hələ də təmir olunmayıb. Onların iddiasına görə, təmir üçün çağırılan ustalar sakinlərlə qeyri-rəsmi söhbət zamanı lifti dəfələrlə təmir etməkdən yorulduqlarını və avadanlığın tamamilə yenisi ilə əvəz edilməsinə ehtiyac olduğunu deyiblər. Sakinlər isə MTK rəhbərliyinin belə bir əvəzləməyə razılıq vermədiyini bildirirlər.
Lift probleminin, xüsusilə yaşlılar və uşaqlı ailələr üçün ciddi çətinlik yaratdığı qeyd olunur. Sakinlərin sözlərinə görə, mənzillərinə qalxmaq və binadan aşağı enmək gündəlik problemə çevrilib.
Bakuplus.az redaksiyası məsələ ilə bağlı "Melissa ASP" MTK rəhbərliyinin də mövqeyini dinləməyə və dərc etməyə hazırdır.
