Qızıl ticarəti ilə məşğul olan Elnarə Şirməmmədova həbs edilib.
Onun barəsində Cinayət Məcəlləsinin külli miqdarda dələduzluq maddəsi ilə iş açılıb. İş üzrə 9 nəfər zərərçəkmiş şəxs qismində tanınıb.
İttihama görə, E.Şirməmmədova vətəndaşlardan ümumilikdə bir milyon üç yüz min manata yaxın pulu dələduzluq yolu ilə alaraq ələ keçirib.
Məhkəmə istintaq müddətində Elnarə Şirməmmədovanın həbsdə saxlanılmasına qərar verib.
9 nəfərin şikayəti əsasında Səbail Rayon Polis İdarəsində açılmış cinayət işinin ibtidai istintaqı artıq başa çatıb. İş baxılması üçün Bakı Ağır Cinayətlər Məhkəməsinə göndərilib.
Bundan başqa, paytaxt sakini, qızıl biznesi ilə məşğul olan Zülfiyyə Quliyevanın da E.Şirməmmədova barəsində Nəsimi Rayon Polis İdarəsinə şikayət etməsi məlum olub. Z.Quliyeva həmcinsinin ona qarşı 940 min manatlıq dələduzluq əməli törətdiyini bildirib. Hazırda bu şikayət üzrə ayrıca material araşdırılır.
Şikayətçilər iddia edir ki, zərərçəkmişlər Elnarənin yaxın adamları olub. Məsələn, bir zərərçəkən qaynıdır, biri xalası qızıdır, aralarında rəfiqəsi və ailə dostları olanlar da var.
Elnarə Şirməmmədovanın atası, cənub zonasında tanınmış müğənni olan İsmayıl Səfərov mövzu ilə əlaqədar bildirib ki, Elnarə xanım heç kimdən pul almayıb, deyilənlərin hamısı şər-böhtandır.
Mənbə: qafqazinfo.az
