Paytaxtın Nəsimi rayonunda, "28 may"Nəqliyyat Mübadilə Mərkəzinin ərazisində sakinlərin narazılığına səbəb olan neqativ hal polis əməkdaşları tərəfindən aradan qaldırılıb.
Bu barədə Bakuplus.az -a Daxili İşlər Nazirliyindən məlumat verilib.
Əldə etdiyimiz məlumata görə, qeyd olunan ərazidə piyadaların hərəkətini çətinləşdirən, qanunsuz küçə ticarəti ilə məşğul olan şəxslər barəsində İnzibati Xətalar Məcəlləsinin müvafiq maddəsinə uyğun olaraq tədbirlər görülüb.
Qeyd edək ki, "28 May" Nəqliyyat Mübadilə Mərkəzi ərazisində küçə ticarətinin nizamsız təşkili narazılığa səbəb olmuşdu. Sosial şəbəkələrdə ərazidə piyadaların hərəkətinə mane olan piştaxta və yeşiklərin yerləşdirilməsinin qarşısının alınması, küçə ticarəti üçün isə müvafiq yerlərin ayrılaraq qaydaların müəyyənləşdirilməsi təklif olunmuşdu.
***
11:40
"28 may" Nəqliyyat Mübadilə Mərkəzi ərazisində küçə ticarətinin nizamsız təşkili narazılıq yaradıb.
Bu barədə "Bakı gündəliyi" səhifəsinin Facebook hesabında paylaşım edilib.
Qeyd edilib ki, problem küçə ticarətinin özündə yox, onun harada, hansı ölçüdə və hansı qaydada aparılmasındadır: "28 May" ərazisində küçə ticarətinə təbii ehtiyac varsa və bunu təşkil etmək mümkündürsə, bunun üçün müvafiq yerlər ayrılsın, layihələndirilsin və qaydaları müəyyən edilsin. Daha "nə gəldi, harada gəldi sat" prinsipi ilə piyada axınının içində piştaxta qurmaq, yerə yeşiklər düzmək halları olmasın. Problem küçə ticarətinin özündə yox, onun harada, hansı ölçüdə və hansı qaydada aparılmasındadır. İnsanlar küçə ticarətinin əleyhinə deyil, sadəcə, nizamlanmayan şəraitdə bunun xaosa çevriləcəyindən ehtiyat edirlər. Məsələn, bu gün "28 May" NMM-in ərazisində iki-üç yerdə müşahidə olunan səliqəsiz küçə ticarəti sabah bütün meydana yayıla bilər?"
