Abşeron rayonunda 25 yaşlı oğlan anasını öldürməyə cəhddə ittiham edilib.
Hadisə rayonun Saray qəsəbəsində baş verib.
Sumqayıt şəhər sakini, 2001-ci il təvəllüdlü Ayaz 1981-ci il təvəllüdlü anası Könülü bıçaqlayaraq öldürmək istəyib.
İttiham materiallarında qeyd olunur ki, Könül hadisədən bir il əvvəl yaşadıqları evi tərk edib və başqa evdə yaşamağa başlayıb. Qadının bu addımı oğlanları – Ayaz və Həsənin, əri Samirin narkotik maddə istifadəçisi olmaları, onların bu pis vərdişləri səbəbindən ona qarşı edilən təzyiq və təhqirlərlə bağlı olub.
Ayaz anasını bu səbəbdən qisas niyyəti ilə onu öldürmək qərarına gəlib.
O, anasının yaşadığı Saray qəsəbəsində yerləşən fərdi yaşayış evinə gedib və mübahisə etdikdən sonra onu öldürmək niyyətini həyata keçirmək məqsədi ilə evin mətbəxinə keçib. Oradan mətbəx bıçağını götürüb və yataq otağına keçib. Qadının bədəninin müxtəlif, o cümlədən həyat fəaliyyəti üçün vacib olan orqanlarının yerləşdiyi nahiyələrindən ümumilikdə 13 xəsarət yetirib.
Ancaq Könül onun əlindən qurtularaq qaça bilib və ona vaxtında ixtisaslaşdırılmış tibbi yardım göstərilməsi ilə həyatı xilas edilib.
Ayazın barəsində Cinayət Məcəlləsinin qəsdən adam öldürməyə cəhd maddəsi ilə ittiham elan olunub.
Məhkəmənin hökmü ilə Ayaz 7 il 10 ay 15 gün müddətə azadlıqdan məhrum edilib. Onun cəzasını ciddi rejimli cəzaçəkmə müəssisəsində çəkməsi müəyyən olunub.
Qeyd edək ki, adlar şərti verilib.
Mənbə: teleqraf.az
