Bakı Ağır Cinayətlər Məhkəməsində hədə-qorxu ilə tələb etmədə təqsirləndirilən Zəminə Əsədovanın cinayət işinin bəzi detalları məlum olub.
Pravda.az-ın əldə etdiyi məlumata görə, hakim Nigar İmanovanın sədrliyi ilə keçirilən prosesdə ittiham aktı elan olunub.
İttihama görə, təqsirləndirilən şəxs tanışı, 1959-cu il təvəllüdlü Rəmzi Səfərovla bağlı əldə etdiyi şəxsi xarakterli görüntülərdən istifadə edərək onu rüsvayedici məlumatlar yayacağı ilə hədələyib və müxtəlif vaxtlarda pul vəsaiti alıb.
Cinayət işi materiallarında göstərilir ki, hadisələrin əsası 2025-ci ilin mart ayında qoyulub.
Belə ki, 1989-cu il təvəllüdlü Zəminə Əsədova və Rəmzi Səfərov Bakı şəhərinin Nəsimi rayonunda yerləşən kirayə mənzildə görüşüblər. Təqsirləndirilən şəxs görüş zamanı kişinin onunla seksual xarakterli hərəkətlər etməsini əks etdirən görüntüləri gizli şəkildə çəkib. Həmin görüntülər sonradan Rəmzi Səfərova qarşı təzyiq vasitəsi kimi istifadə olunub. Bir müddət sonra qadın kişi ilə telefon əlaqəsi saxlayaraq ondan pul tələb etməyə başlayıb və zərərçəkmişdən ümumilikdə 2 min manat pul alıb.
Məhkəmənin hökmü ilə o, 4 il 8 ay müddətə azadlıqdan məhrum edilib.
Qeyd edək ki, ad və soyadlar şərtidir.
