Bakı Şəhər İcra Hakimiyyətinin sabiq Aparat rəhbərinə hökm oxunub. Bu haqda 23 dekabr tarixində Report məlumat verib.
Bakı Ağır Cinayətlər Məhkəməsində Bakı Şəhər İcra Hakimiyyətinin sabiq işçisi Rasim Quliyev 3 il müddətinə azadlıqdan məhrum edilib.
BŞİH başçısının Aparat rəhbəri vəzifəsində işləmiş Quliyev, Nəsimi rayonu, Dilarə Əliyeva küçəsi 141 ünvanında yerləşən yaşayış binalarının sökülməsinə sərəncam imzalayıb. Daha sonra o, həmin ərazidə yeni yaşayış binalarının tikintisinə dair qanunsuz icazə verib.
Həmçinin MTK-nın həmin ərazidə 1893-cü ildə inşa edilmiş əhəmiyyətli tarix və mədəniyyət abidəsi kimi dövlət tərəfindən mühafizə olunan yaşayış evinin olmasını nəzərə almadan qanunsuz olaraq söküntüsünə başlamasına qərar verib.
Rasim Quliyevə Cinayət Məcəlləsinin “Ağır nəticələrə səbəb olan vəzifə səlahiyyətlərindən sui-istifadə” və “Qanunla müəyyən olunmuş qaydaları pozmaqla tikinti və ya quraşdırma işlərinin aparılmasına icazə vermə ağır nəticələrə səbəb olduqda” maddələri ilə ittiham olunub.
