Bakı Apellyasiya Məhkəməsində xuliqanlıqda və qəsdən sağlamlığa az ağır zərər vurmada təqsirləndirilən Əşrəf Yusifzadənin barəsindəki hökmdən verilən apellyasiya şikayəti üzrə məhkəmə prosesi başa çatıb.
Pravda.az-ın əldə etdiyi məlumata görə, hakim Habil Məmmədovun sədrliyi ilə keçirilən prosesdə qərar elan edilib.
Qərara əsasən, zərərçəkmişin apellyasiya şikayəti təmin edilməyib.
İttihama görə, hadisə 2024-cü il Bakı şəhəri, Nərimanov rayonu ərazisində yerləşən restoranda qeydə alınıb.
Zərərçəkmiş Samir Sarıyev restoranda olarkən digər müştəriləri narahat edib. Bu səbəbdən təqsirləndirilən şəxs ondan obyekti tərk etməsini istəyib. Zərərçəkmiş şəxs bu tələblə razılaşmayıb və Əşrəfin qarşı nalayiq ifadələr işlədib. Bundan sonra təqsirləndirilən şəxs qəsdən Samirin sifət nahiyəsinə yumruq zərbəsi vurub. Hadisə nəticəsində zərərçəkmiş şəxsin burun sümüyündə ikili yerdəyişən sınıqlar əmələ gəlib.
Məhkəmə iclasında Əşrəf Yusifzadə elan olunmuş ittiham üzrə özünü təqsirli bilmədiyini deyib.
Nərimanov Rayon Məhkəməsi "Konstitusiya və Suverenlik İli" münasibətilə amnistiya elan edilməsi haqqında" Milli Məclisin müvafiq qərarını tətbiq edərək təqsirləndirilən şəxsi təyin olunmuş cəzadan azad edib.
Hökmdən narazı qalan zərərçəkmiş şəxs apellyasiya şikayəti verərək, birinci instansiya məhkəməsinin hökmünün ləğv edilməsi, təqsirləndirilən şəxsin barəsində azadlıqdan məhrumetmə cəzası tətbiq edilməklə ittihamedici hökm çıxarılmasını xahiş etmişdi.
Qeyd edək ki, ad və soyadlar şərti verilib.
