Bakının İçərişəhər qala divarları vandalizm izlərindən tamamilə təmizlənib. Bu haqda “İçərişəhər” Dövlət Tarix-Memarlıq Qoruğu İdarəsindən bu gün, 3 oktyabr tarixində məlumat verilib.
Qurumdan bildirilib ki, son bir ildə qoruqda dəfələrlə vandalizm aktlarına rast gəlinib və monitorinqlər nəticəsində 70-dən çox belə hal aşkar edilib.
Qala divarlarını zədələyən şəxslər aidiyyəti strukturlarla birlikdə vaxtında müəyyən edilmiş və barələrində qanuni tədbirlər görülmüşdür.
Ötən həftə qala divarlarında vandalizm izlərinin aradan qaldırılması üçün bərpa işləri başa çatdırılıb. İşlər beynəlxalq təcrübəyə malik mütəxəssislərin nəzarəti altında yerli qrup tərəfindən həyata keçirilib.
“İçərişəhər” qoruğu Azərbaycan Respublikasının tarixi irsinin bir hissəsidir. Dövlət Tarix-Memarlıq Qoruğu İdarəsinin fəaliyyətinin prioritet istiqamətlərindən biri dünya, ölkə və yerli əhəmiyyətli abidələrin qorunmasıdır.
[URIS id=72865]
