Azərbaycan Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin Bakı Regional İdarəsi Səbail rayonu, Neftçilər prospekti, 51 ünvanında yerləşən Səfərbərlik və Hərbi Xidmətə Çağırış üzrə Dövlət Xidmətinə xəbərdarlıq edib. Bu barədə qurumun mətbuat katibi Nuridə Allahyarova Facebook səhifəsində bu gün, 4 oktyabr tarixində məlumat verib.
13 sentyabr tarixində qeyd olunan ünvanda yerləşən abidəyə baxış zamanı Bakı Regional Dövlət Qulluğu İdarəsinin əməkdaşları tərəfindən binanın fasadında ayaqaltılar qurulmaqla və dam hissəsinə qeyri-qanuni müdaxilələr edilməklə təmir-bərpa işlərinə hazırlıq görüldüyü aşkar olunub.
Sentyabrın 16-da Səfərbərlik və Hərbi Xidmətə Çağırış üzrə Dövlət Xidmətinə işin dayandırılması və layihənin razılaşdırılması tələbi ilə məktub göndərilib. Lakin buna baxmayaraq, təmir işləri başlanılıb və hazırda davam etdirilir.
“Ümid edirik ki, Səfərbərlik və Hərbi Xidmətə Çağırış üzrə Dövlət Xidməti tarixi-memarlıq abidəsinin qorunmasına həssas yanaşaraq qısa zamanda təmir-bərpa işlərinin qanunvericiliyin tələbləri çərçivəsində həyata keçirilməsini təmin edəcəkdir.
Əks halda yol verilmiş müdaxilə faktına görə protokolun yazılması və aidiyyəti üzrə hüquq mühafizə orqanlarına müraciət edilməsi nəzərdə tutulur”, - deyə Allahyarova yazıb.
[caption id="attachment_73084" align="alignnone" width="640"]
Foto açıq mənbədən[/caption]
