Bakı Ağır Cinayətlər Məhkəməsində xüsusi amansızlıqla qətldə təqsirləndirilən Emil Ağacanovun cinayət işi üzrə məhkəmə prosesi başlayıb. Proses hakim Səbinə Məmmədzadənin sədrliyi ilə keçirilib. Bildirilib ki, Emil Ağacanov anlaqsız vəziyyətdə olduğu üçün məhkəməyə ixtisaslaşdırılmış tibb müəssisəsindən gətirilib.
Oxu.az xəbər verir ki, ittihama görə, 22 avqust 2025-ci ildə reabilitasiya mərkəzinə aparılan Emil Ağacanov müalicədən imtina edərək sevgilisi İradə Muradova ilə evə qayıdıb və gecə saatlarında qadını boğaraq qətlə yetirib.
Təqsirləndirilən şəxs məhkəmədə qeyri-adekvat və mistik açıqlamalar verib. O bildirib ki, İradə Muradova ilə 15 ildən çox sevgili olub və onu çox sevib. Emil ifadəsində bildirib ki, onları ayıran şeytanlar olub. Belə ki, o, qadının "cinlər tərəfindən idarə edildiyini" düşünüb.
Onun sözlərinə görə, ailəli olsa da, İradə ilə evlənmək istəyib. Ancaq qadın xristian olduğu üçün evlilik baş tutmayıb. Emil qeyd edib ki, hadisə günü İradəni dindən uzaqlaşdıran "şeytan əməli" səbəbindən telefonunu sındırıb, ayətül-kürsü oxuyub və İradəyə kəlmeyi-şəhadəti öyrədib. Ancaq sonra yenidən mübahisə başlayıb və onu hamama qüsl almağa aparıb. Emil hadisə zamanı hamamda yıxıldığını, sonra isə heç nə xatırlamadığını iddia edib və hələ də İradənin ölmədiyini söyləyib.
Emil Ağacanov 2010-cu ildən narkotik istifadə etdiyini, hadisə günü də narkotik qəbul etdiyini etiraf edib.
Zərərçəkmiş şəxsin qanuni nümayəndəsi Rəna Muradova isə təqsirləndirilənin dediklərini yalan adlandırıb. Onun sözlərinə görə, Emil narkotik təsiri altında bacısını öldürüb və özünü dəliliyə vurur. Bildirilib ki, İradənin meyiti tanınmaz halda olub, bədənində ağır xəsarətlər aşkarlanıb.
Məhkəmə prosesi yanvarın 29-da davam etdiriləcək.
Qeyd edək ki, Emil Ağacanov bir neçə şirkətin və "YAMAMAY" brend mağazasının sahibidir.
