Milli Məclis Azərbaycanda yaş məhdudiyyəti tətbiq edilən sosial şəbəkə platformalarının fəaliyyəti ilə bağlı tələblərin pozulmasına görə cərimələri son oxunuşda qəbul edib.
Bakuplus.az məlumat verir ki, yeni qaydalara əsasən, provayderlər istifadəçilərin yaşını yoxlamalı, 16 yaşdan kiçik şəxslərin hesab açmasına imkan verməməli, 16-18 yaşlı istifadəçilər üçün isə valideyn razılığı və nəzarət mexanizmlərini təmin etməlidirlər. Bundan başqa, onlar Azərbaycanda qeydiyyata alınmalı, dövlət qurumlarının sorğularını vaxtında cavablandırmalı və zərərli məzmunun 24 saat ərzində aradan qaldırılmasını təmin etməlidirlər.
Tələblərə əməl etməyən provayderlər əvvəlcə yazılı xəbərdarlıq alacaq. Problem aradan qaldırılmazsa, 100 min manat, daha sonra isə əlavə 300 min manat maliyyə sanksiyası tətbiq ediləcək. Qanun pozuntusu davam edərsə, platformada reklam yerləşdirilməsi qadağan oluna, internet trafiki mərhələli şəkildə 20, 50 və 90 faiz azaldıla bilər.
Bundan əlavə, məlumatların təqdim edilməməsi, təhlükəsizlik tələblərinin pozulması və fərdi məlumatlardan qanunsuz istifadə hallarında vəzifəli və hüquqi şəxslər üçün 50 min manatadək inzibati cərimələr nəzərdə tutulur. Qanun rəsmi dərc edildiyi gündən 12 ay sonra qüvvəyə minəcək.
Qeyd edək ki, qanun dərc edildiyi gündən on iki ay sonra qüvvəyə minəcək.
