Tanınmış teatr və kino aktyoru, "Şərəf" ordenli, Xalq artisti Səyavuş Aslanın anadan olmasından 91 il keçir.
Bakuplus.az xatırladır ki, Səyavuş Məmmədağa oğlu Aslanov 1935-ci il sentyabrın 5-də Bakıda doğulub. Aktyorluğa həvəskar dram dərnəyindən başlayıb. 1954-cü ildə musiqili komediya estrada truppasında, 1958-ci ildə isə Quba Dövlət Dram Teatrında çalışıb. Uzun illər Dövlət Musiqili Komediya Teatrının aparıcı aktyorlarından olub, 1994–1996-cı illərdə həmin teatrın bədii rəhbəri işləyib.
Səyavuş Aslan həyatında yalnız bir qadını – həyat yoldaşı Ofeliya Aslanı sevib. Aktyor onunla Quba teatrında tanış olub. Ailələrin etirazına baxmayaraq, "Ya Ofeliya ilə evlənəcəyəm, ya da heç kimlə" deyərək onunla ailə qurub. Cütlüyün Çingiz və Eldar adlı iki oğlu olub.
Deyilənə görə, maddi vəziyyətləri ağır olduğundan toy günü Səyavuş Aslanın bəylik kostyumu olmayıb. Teatr rəhbərliyinə müraciət etdikdən sonra paltar sexindən ona kostyum verilib. Aktyor həyat yoldaşından ayrılsa da, sonralar başqası ilə evlənmək təklifini rədd edib.
Səyavuş Aslan 1984-cü ildən Akademik Milli Dram Teatrının aktyoru olub. "Kəndimizin mahnısı", "Özümüz bilərik", "Altı qızın biri Pəri", "Ulduz" kimi tamaşalarda və filmlərdə yaddaqalan obrazlar yaradıb, televiziya tamaşalarında yüzdən çox obraz ifa edib.
Səyavuş Aslan 1974-cü ildə Əməkdar artist, 1982-ci ildə Xalq artisti fəxri adlarına layiq görülüb. Prezident təqaüdçüsü olub və 25 iyun 2013-cü ildə "Şərəf" ordeni ilə təltif edilib.
Xalq artisti 27 iyun 2013-cü ildə ağır xəstəlikdən sonra Bakıda vəfat edib və İkinci Fəxri xiyabanda dəfn olunub.
