10 fevral Azərbaycan Respublikasının Əməkdar artisti, aktrisa və rəssam Suğra Bağırzadənin doğum günüdür.
Suğra Bağırzadə 10 fevral 1947-ci ildə Bakı şəhərində anadan olub. Hələ uşaq yaşlarından incəsənətə böyük maraq göstərib. İlk uğuru 1959-cu ildə Moskva şəhərində keçirilən Azərbaycan mədəniyyəti on günlüyündə “Bolşoy Teatr”ın səhnəsində solo ifa etdiyi “Cücələrim” mahnısı olub. Məhz Suğra Bağırzadənin ifasında və maestro Niyazinin dirijorluğu ilə Azərbaycan Dövlət Simfonik Orkestrinin müşayiəti ilə “Cücələrim” mahnısı “Dünyanın ən yaxşı uşaq səsləri” toplusuna daxil edilib. 12 yaşında istedadlı qız “Azərbaycanfilm” kinostudiyasına dublyaj aktrisası kimi dəvət olunub. 8-ci sinifdə oxuyarkən rejissor Zeynəb Kazımovanın “Yollar və küçələr” qısa metrajlı filmində baş rolda çəkilib.
1963-cü ildə o, Ağarza Quliyevin böyük populyarlıq əldə etmiş, o vaxtdan böyük uğur və tamaşaçı məhəbbəti qazanan “Ulduz” filmində Yetər roluna dəvət olunub.
1970-ci ildə Azərbaycan Neft Akademiyasının Mühəndislik-texnologiya fakültəsini bitirdikdən sonra yenidən kinostudiyaya mühəndis kimi qayıdıb. Bununla yanaşı aktrisa kimi fəaliyyətini davam etdirib və bir çox filmlərdə yadda qalan obrazlar yaradıb. Bağırzadə “Alma almaya bənzər” (1975), “Şir evdən getdi” (1977), “Tələ” (1990), “Yuxu” (2001), “Güllələnmə təxirə salınır!...” (2003), “Sonuncu şahid” (2004), “Qəmbər Hüseynli” (2007) filmlərində rol alıb.
2008-ci ildə Əməkdar artist fəxri adına layiq görülüb.
