Bakının Sabunçu rayonunda qohumlar arasında baş verən mübahisə cinayətlə nəticələnib.
Demokrat.az xəbər verir ki, hadisə rayonun Ramana qəsəbəsində baş verib. Ucar rayon sakini, 1980-ci il təvəllüdlü Adil bibisi oğlu Aqil (adlar şərtidir – red.) ilə mübahisə edib.
Onların arasında mübahisənin yaranmasına səbəb Aqilin xəstə yatağında olan atasına baxmaması olub.
Hadisə günü Adil bibisinin evinə qonaq gəlib. Bu zaman o, bibisi oğlu Aqilin anasının təkidinə baxmayaraq atasına qulluq etmədiyinin şahidi olub.
Adil ilə bibisi oğlu arasında yaranmış şəxsi münasibətlərin pozulması zəminində baş verən mübahisə zamanı o, Aqili yumruq, təpik və baş zərbələri ilə bədəninin müxtəlif nahiyələrindən vurub. Nəticədə Aqilə müxtəlif dərəcəli bədən xəsarətləri yetirilib.
Adil barəsində Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham irəli sürülüb. İş üzrə izahat verən Adil ona elan olunmuş ittiham üzrə özünü təqsirli bilib.
Sabunçu Rayon Məhkəməsinin hökmü ilə Adil aylıq qazancının 5 faizi dövlət nəfinə tutulmaqla 1 il müddətinə islah işləri cəzasına məhkum edilib.
