Paytaxtın Yasamal rayonunun müxtəlif ünvanlarında qanunsuz heyvan kəsimi məntəqələri aşkarlanıb. Bu haqda bu gün, 18 avqust tarixində Qida Təhlükəsizliyi Agentliyinin mətbuat xidməti məlumat yayıb.
Obyektlərdə heyvan kəsiminin baytarlıq nəzarəti olmadan həyata keçirildiyi məlum olub. Həmçinin qida təhlükəsizliyi qaydalarına riayət olunmadığı müəyyənləşib.
Aparılan reyd zamanı Həsən Məcidov küçəsi, 65 ünvanında “Zəngəzur ət”, Akim Abbasov küçəsi, 16 ünvanında “Qara Dana”, Akim Abbasov küçəsi, 68A ünvanında “Ağcabədi-Bərdə heyvanları”, Zahid Xəlilov küçəsi, 83-85 ünvanında “Halal kəsilmiş dana və quzu əti” məntəqələrində antisanitar şəraiti və digər nöqsanlar aşkarlanıb.
Daha öncə, 8-12 avqust tarixlərində müvafiq tədbirlər, həmçinin Suraxanı rayonunda keçirilib. Yoxlama zamanı 6 nəfər cəzalanıb.
