Bakı Ağır Cinayətlər Məhkəməsində xalası oğlunu bıçaqlamaqda təqsirləndirilən Səid Babazadənin cinayət işi üzrə məhkəmə prosesi keçirilib.
Hakim Hüseyn Hüseynlinin sədrliyi ilə keçirilən iclasda dövlət ittihamçısı ittiham aktını elan edib.
Təqsirləndirilən şəxs özünü təqsirli bilib. O bildirib ki, hadisə günü, martın 27-də qohumlarının yas mərasimində xalası oğlu Elşad Bayramovla olub. Yasda gülmələri və ardınca yaranan zarafat səbəbindən Elşadın hamının yanında ona irad bildirməsi xoşuna gəlməyib.
Evə qayıtdıqdan sonra telefonla mübahisə edən tərəflər daha sonra məhəllədə görüşüblər. Səid cibinə bıçaq qoyduğunu və qarşılıqlı dava zamanı Elşadın onu bıçaqladığını deyib. O, bundan sonra Elşadı qorxutmaq istəyərkən onu qolundan yaraladığını bildirib.
Zərərçəkmiş Elşad Bayramov isə Səidin onu iki dəfə bıçaqladığını deyib. O, xalası oğlu ilə barışdığını və ondan şikayətinin olmadığını bildirib.
Xatırladaq ki, hadisə martın 27-də Sabunçu rayonunda baş verib. Səid Babazadə Elşad Bayramovun döş qəfəsinə bıçaqla zərbə endirərək ona ağır xəsarət yetirib.
Səid Babazadə Cinayət Məcəlləsinin müvafiq maddəsi ilə ittiham olunub. Növbəti məhkəmə iclası sentyabrın 18-də saat 10:40-da keçiriləcək.
