Xətai rayonu Rəşad Bağırov 36 ünvanında boru partlaması nəticəsində yaranmış problemin həll edilməsinə “Oba” marketlər şəbəkəsinin həmin ərazidə yerləşən mağazası imkan vermir.
İri Şəhərlərin Birləşmiş Su Təchizatı Xidmətinin mətbuat xidmətindən Bakuplus.az-a göndərilən videoda qurumun əməkdaşı problemin həll edilməməsinin səbəbini həmin mağaza ilə əlaqələndirir.
Qeyd edək ki, saytımız daha əvvəl bu problemi iki dəfə qabardıb, ərazini su basdığını yazıb. İri Şəhərlərin Birləşmiş Su Təchizatı Xidmətindən əvvəlcə bildirilib ki, problem həll olunub. Ərazidə yaşayan sakinlərin problemin həll olunmadığını bildirməsindən sonra qurum bəyan edib ki, qeyd olunan ünvanda su xəttində olan axıntının qarşısı alınıb, lakin növbəti gün ərazidən keçən naməlum nəqliyyat vasitəsinin təsirindən xətt yenidən qəzalı vəziyyətə düşüb, sözügedən hal yenidən müşahidə olunub, problemin aradan qaldırılması ilə bağlı sabah ərazidə qazıntı işləri aparılacaq və borunun fəaliyyəti bərpa ediləcək.
Təəssüf ki, problem bu günədək həll olunmamış qalıb.
