Bir neçə gün əvvəl sosial şəbəkələrdə 3-cü mikrorayon dairəsi üzərindən keçən körpüdə çatların əmələ gəlməsi ilə bağlı görüntülər yayılıb. Bakı sakinləri körpünün uça biləcəyindən narahatdırlar. Bu haqda 12 sentyabr tarixində ATV Xəbər reportaj təqdim edib.
Oxşar vəziyyət metronun “20 Yanvar” stansiyası yaxınlığındakı körpüdə də müşahidə olunur.
Memar Muxtar Ərturanın sözlərinə görə, bu “çatlar” tikinti zamanı yaranan temperatur kəsikləridir.
“Temperatur kəsikləri illərlə baxılmadığı üçün deformasiya tikişlərinin rezinləri sıradan çıxıb. Tikişlər sıradan çıxdığı üçün yağış suları sözügedən boşluqlardan aşağı tökülür”, - deyə o əlavə edib.
Mütəxəssis onu da qeyd edib ki, genişləndirici birləşmələrdə ciddi problemlər yaranarsa, faciə baş verə bilər.
Azərbaycan Avtomobil Yolları Dövlət Agentliyinin (AAYDA) mətbuat xidmətindən məlumat verilib ki, paytaxtda, o cümlədən respublika ərazisində yerləşən bütün mühəndisi qurğular daim nəzərət altında saxlanılır və mütəmadi olaraq yoxlanılır. Sözügedən əraziyə də qurumun əməkdaşları cəlb olunaraq yoxlanış aparıblar. Ancaq “temperatur arakəsmələri”nin texniki vəziyyətində nöqsanlar aşkar olunmayıb.
