Bu gün Xalq artisti, Azərbaycan Respublikasının Dövlət Mükafatı laureatı, aktyor Yaşar Nurinin anım günüdür.
Bakuplus.az xəbər verir ki, Yaşar Nuri 1951-ci il sentyabr ayının 3-də Bakıda tanınmış aktyor Məmmədsadıq Nuriyevin ailəsində dünyaya gəlib. Yaşasaydı, bu gün 73 yaşını qeyd edəcəkdi.
Aktyor səhnəyə ilk dəfə on bir yaşında “Toy kimindir?” (dramaturq Məhərrəm Əlizadə) tamaşasında Tapdıq rolunda çıxıb.
O, 1968-ci ildə Bakıdakı 173 nömrəli orta məktəbi bitirib, Azərbaycan Dövlət İncəsənət İnstitutunun (indiki ADMİU) dram və kino aktyorluğu fakültəsinə daxil olub.
Tələbəlik illərində “Sevil”də Balaş, “Toy”da Salmanov, “Günahsız müqəssirlər”də Neznamov və başqa obrazlar yaradıb.
Yaşar Nuri 1972-ci ildə institutu bitirdikdən sonra 1 il orduda xidmət edib və institutun tədris teatrında aktyor işləyib. Mərhum aktyor 1974-cü ildə Akademik Milli Dram Teatrının baş rejissoru Tofiq Kazımovun dəvətilə bu kollektivin aktyor truppasına qəbul olunub. Həmin illər o, tanınmış səhnə xadimləri Rza Təhmasib və Əliheydər Ələkbərovdan aktyorluq sənətinin incəliklərini öyrənib.
Yaşar Nuriyev Milli Dram Teatrında işlədiyi illərdə repertuardan düşməyən 20-dən çox tamaşada yaddaqalan obrazlar yaradıb. Bunların sırasında Sərsəm Salman (“Dəli yığıncağı”), Məşədi Oruc (“Ölülər”, C.Məmmədquluzadə), Əbdüləli bəy, (“Sevil”, C.Cabbarlı), Ağamusa Nağıyev (“Mesenat”, Ə.Əmirli), Kürən (“Xəcalət”, H.Mirələmov) Rəhman (“Fəryad”, B.Vahabzadə), İsgəndərzadə (“Ah, Paris… Paris!..”, Elçin), Xandəmir (“Afət”, Hüseyn Cavid) və s. xüsusi yer tutur.
Teatrda olduğu kimi Yaşar Nuri həm də məşhur kino ustasıdır. Onun böyük populyarlıq qazandığı çoxlu ekran obrazları var. Əlliyə yaxın bədii filmə çəkilib, Azərbaycan Dövlət Televiziyasında hazırlanmış yüzdən çox tamaşa, bədii kompozisiya, satirik səhnəciklərdə iştirak edib.
Qeyd edək ki, kinorejissor Şamil Mahmudbəyovun ekranlaşdırdığı “Dörd bazar günü” filmində yaratdığı Seyran obrazı Yaşar Nurinin kinoda ilk işi olub.
Bundan əlavə, aktyorun “Yaramaz”dakı Maşallahını, “Lətifə”dəki Məmməd, “Qətl günü”ndəki Mahmud doktor, “Nə Gözəldir Bu Dünya...”dakı Asim Əliyeviç, “Hər Şey Yaxşılığa doğru”, “Nakəs”, ““Fransız”, “Yoxlama” filmlərindəki bir-birindən maraqlı obrazlarını da unutmaq olmaz.
Xalq artisti 2012-ci il sentyabrın 1-də respublika Prezidentinin fərmanı ilə “Şöhrət” ordeni ilə təltif edilib.
Aktyor uzun sürən xəstəlikdən sonra 2012-ci il noyabrın 22-də ömrünün 62-ci ilində vəfat edib.
