Bakı sakini “Omid” mağazalar şəbəkəsinin Hökməlidə yerləşən filialından şikayətçidir.
Bakuplus.az-ın məlumatına görə, qəsəbə sakini ötən il sözügedən mağazadan kombi alıb. Şikayətçi iddia edir ki, iki il zəmanəti olmasına baxmayaraq qurğu artıq işləmir.
“Çimdiyimiz yerdə kombi söndü. Dəfələrlə zəng elədik. Gəlib 10 gün ərzində baxış keçirdilər. Həmin bu “kitayski” model işləmədi. Bildirdilər ki, kombi yuyulmalıdır və 60 manat ödəniş etməlisiniz. Biz də razılaşdıq. Ancaq daha sonra dedilər ki, problem istilikdəyişdirici qurğudadır. Dedilər, bunu şaxta vurub. Kombi xüsusi otaqda quraşdırılıb. Qapısı da var. Orada don vura bilməz. Müvafiq qurumlar kömək eləsinlər. Bu mağazalar şəbəkəsi istehsalı bitmiş, yararsız vəziyyətdə olan cihazları satır”, - deyə şikayətçi bildirib.
Onun sözlərinə görə, suqızdırıcı qurğunu 1370 manata alıb:
“Mən zəhmətimlə, zülmlə krediti zorla ödəyib qurtarmışam. Mənə isə axırda bu qaldı”.
Məsələni aydınlaşdırmaq üçün “Omid” mağazalar şəbəkəsi ilə əlaqə yaratdıq.
Mağazadan bildirildi ki, məsələdən xəbərdardırlar.
“Biz satışı edirik. Bundan sonra isə alınan mallara servis baxır. Servis də baxıb və yazılı formada problemin nə olduğu barədə alıcıya talon verib. Hər şey müştəriyə bildirilib. Müştəri bura gəlib və işçilərə qarşı çox qeyri-etik ifadələr işlədib. Biz də 102 qaynar xətlə əlaqə saxlayıb məlumat vermişik. Hadisə ilə əlaqədar tədbir görüləcək”, - deyə mağaza müdiri qeyd edib.
