Sabunçu rayonu ərazisində qəzalı vəziyyətdə olan binanın sakinləri acınacaqlı vəziyyətlə üzləşiblər. Bu haqda 12 sentyabr tarixində Qaynarinfo.az məlumat verib.
Sabunçu qəsəbəsi, H.B.Zərdabi küçəsində yerləşən 13-cü binanın sakinləri bildirirlər ki, bina 1880-ci ildə tikilib və bu səbəbdən yararsız vəziyyətdədir.
Faktla bağlı Sabunçu Rayon İcra Hakimiyyəti bildirib ki, qəzalı bina barədə məlumatlıdırlar:
"Bakı şəhəri üzrə qəzalı vəziyyətdə olan binaların siyahısı hazırlanaraq aidiyyəti qurumlara göndərilib. Hazırda rayon ərazisində qəzalı vəziyyətləri ilə bağlı akt tərtib olunan binaların sayı 19-dur. Bu binalara Fövqəladə Hallar Nazirliyi akt tərtib edib. Digər tərəfdən, 17 binanın da təmir-bərpa işlərinə ehtiyaclı olması müəyyən edilib. Ümumilikdə isə qəza aktı olmayan 177 bina var. Onlar barədə siyahılar tərtib olunaraq aidiyyəti qurumlara təqdim edilib və bu barədə qərar veriləcək".
