Paytaxtın Akademik Həsən Əliyev küçəsi ilə “Koroğlu” metrosunu birləşdirəcək yolun tikintisinə başlanılıb. Artıq yeni yolun inşasına görə məşhur “Keşlə bazarı” və ona bitişik bəzi tikililər sökülür.
Məlumata görə Akademik Həsən Əliyev küçəsinin Əhməd Rəcəbli küçəsi ilə kəsişməsindən Koroğlu metrosuna qədər uzanacaq yeni yolun tikintisinə görə ərazidəki bir sıra obyektlər söküləcək.
Söküləcək obyektlər arasında məşhur “Şəki Qala” və “Xal-xal” restoranlarının da olduğu iddia edilir.
Məlumatı dəqiqləşdirmək üçün hər iki restoranla əlaqə saxlanılıb. Lakin restoran əməkdaşları müdiriyyətin hazırda iş yerində olmadığını bildirərək, hər hansı məlumat verməyiblər.
Məsələ ilə bağlı Azərbaycan Avtomobil Yolları Dövlət Agentliyindən (AAYDA) bizim.media-nın sorğusuna cavab olaraq bildirilib ki, yeni tikiləcək yol 2 tərəfli və 6 zolaqlı olacaq:
“Ona görə də bəzi ərazilərdə genişləndirmə işləri aparılacaq. Buna görə bəzi iaşə və ticarət obyektlərinin köçürülməsi zərurəti yaranacaq. Hələlik, layihələndirmə və qiymətləndirmə işləri aparılır. Hansı obyektlərin söküləcəyi isə yaxın zamanda bilinəcək”.
