Binəqədi rayonu Sulutəpə qəsəbəsində sakinlər yaradılmış kommunal və yol vəziyyətindən narazıdır. Bu haqda bu gün, 12 aprel tarixində Real TV reportaj hazırlayıb.
Eni təqribən 40 sm olan dar yoldan ərazidə yaşayan sakinlər illərdir ki, gediş gəliş üçün istifadə edirlər. Həmin yolla hər gün təxminən 500 uşaq məktəbə, hazırlığa gedir. Yağıntı olan günlərdə isə yol keçirməz olur.
Sakinlər deyir ki, dar yoldan istifadə etmələrinə səbəb məhəllələrindən keçən kanalizasiya xəttinin yararsız vəziyyətdə olmasıdır. Xəttin ərazidən keçən hissəsinin üstü açıq olduğundan, borularda suyun miqdarı artan zaman tullantı suları həyətlərə, evlərin zirzəmisinə dolur. Beləcə üfunət qoxulu sular yolları keçilməz etdiyindən, sakinlər evdən çölə çıxmaq üçün rezin çəkmədən istifadə etməli olurlar.
Üfunət qoxan kanalizasiya suları bir tərəfdən, ətrafa atılan zibillər isə digər tərəfdən ətrafda antisanitar vəziyyət yaradır. Qonşular deyir ki, atılan zibillərə itlər yığışır ki, onlar da məktəbə, hazırlığa gedən uşaqlara hücum edirlər.
Sözügedən ünvanda yaşayan sakinlərin problemləri ilə bağlı əvvəlcə Binəqədi rayon Sukanal İdarəsinin nümayəndəsi bildirib ki, Sulutəpə qəsəbəsi 2-ci Dəyirman küçəsi, döngə 2 ünvanından keçən kanalizasiya xətti yenidən çəkilməlidir. Bununla bağlı aidiyyəti qurumlara rəsmi müraciət də olunub.
Sulutəpə qəsəbəsindəki 2-ci Dəyirman küçəsi, döngə 2 ünvanına yaxın ərazidə yerləşən dalanlardan zibil tullantılarının təmizlənməməsinə gəlincə, Binəqədi rayon Mənzil Kommunal Təsərrüfatı Birliyindən bildirildi ki, bələdiyyələrə edilən müraciətlər əsasında ərazilərə zibil qabları qoyulur.
Yollar dar olduğundan bəzi ərazilərdə zibil qablarının quraşdırılması mümkün deyil. Buna görə də konteynerlər zibil maşınlarının sərbəst hərəkət edə biləcəyi, bir qədər aralı yerlərdə quraşdırılır. Sakinlər uzağa getmək əvəzinə zibilləri yolun kənarına ataraq antisanitar mühit yaradır ki, bu da xoşagəlməz vəziyyətə gətirib çıxarır. Həmçinin zibil qablarının yaşayış binalarına yaxın yerləşdirilməsi üçün yoxlamalar aparılacaq. Zibillərin yaxın vaxtlarda çıxarılacağı da bildirilib.
