Övladını Xırdalan şəhər Uşaq Poliklinikasına aparan Bakı sakini xoşagəlməz mənzərə ilə qarşılaşıb.
Bu barədə Bakuplus.az-a müraciət edən şikayətçinin sözlərinə görə, səhiyyə ocağı təmirsiz və antisanitar şəraitdə fəaliyyət göstərir.
Redaksiyamıza göndərilən görüntülərdə həkim otağının qarşısında uçuq-sökük döşəmə və tavan diqqət çəkir.
Şikayətçi bildirib ki, insanların sağlamlığına xidmət edən poliklinikanın belə bərbad vəziyyəti artıq uzun müddətdir davam edir.
Tibb müəssisəsinin acınacaqlı durumu ilə bağlı cavabdeh quruma, yəni Tibbi Ərazi Bölmələrinin İdarəetmə Birliyinə (TƏBİB) sorğu ünvanlandıq.
Sorğumuza cavab olaraq bildirildi ki, Abşeron Rayon Mərkəzi Xəstəxanasının tabeliyində struktur dəyişikliyi əsasında Poliklinika şöbəsi ştat üzrə ləğv edilib və şöbənin fəaliyyəti Ailə Sağlamlıq Mərkəzi kimi davam etdirilib.
“Uşaq poliklinikası kimi fəaliyyət göstərən binanın istifadəsinə isə uzun müddət öncə məhdudiyyət tətbiq edilib.
1970-ci illərdə istifadəyə verilən sözügedən binada vətəndaşlara göstərilən tibbi xidmətlərə maneə olmadan cari təmir işlərinə başlanılıb”, - deyə TƏBİB-dən bildirilib.
