Paytaxtın Yasamal rayonu, Abbas Mirzə Şərifzadə küçəsi, 16 ünvanında ticarət obyektləri sökülüb. Onların bir çoxu 30 ildən artıqdır ki, orada fəaliyyət göstərib. Bu səbədən söküntü sahibkarların ciddi narazılığına səbəb olub. Bu haqda bu gün, 11 iyul tarixində Bakuplus.az Baku TV-yə istinadən məlumat verir.
Sahibkarların dediklərinə görə, söküntü əvvəlcədən xəbərdarlıq edilmədən başlayıb və ciddi ziyana gətirib çıxarıb. “Mallarımız dağıntılar altında qaldı, böyük itkilər verdik”, – zərərçəkmiş sahibkarlardan biri deyib.
Yerli orqanların hadisələrlə bağlı fərqli versiyası var. Yasamal Rayon Mənzil Kommunal Təsərrüfatı Birliyinin rəhbəri Vüsal Hüseynov bu ərazinin yataqxanaya aid olduğunu və yenidən qurulmalı olduğunu iddia edir. "Gələcəkdə bu ərazi təmir edilərək istifadəyə veriləcək", – deyə Hüseynov bildirib.
Onun sözlərinə görə, mülk sahiblərinə söküntü ilə bağlı bir neçə ay əvvəl xəbərdarlıq edilib, bəziləri hətta məhkəməyə cəlb olunublar. Lakin sahibkarlar bu məlumatı inkar edirlər.
