Son günlər insanlar arasında koronavirusdan da ağır virus infeksiyası yayılıb. İmmunitet sisteminin zəifləməsi, hava şəraitinin dəyişməsi və insanların daha çox qapalı məkanlarda olması virusların daha sürətlə yayılmasına şərait yaradır.
Bəs görəsən, yayılan virus infeksiyasının mənşəyi nədir, onu necə adlandırmalıyıq?
Mövzu ilə bağlı Bakuplus.az-a açıqlama verən infeksion xəstəlikləri və klinik mikrobiologiya uzmanı doktor Vasif Əliyevin sözlərinə görə, yaranmış vəziyyətə konkret bir virusun səbəb olduğunu demək düzgün deyil:
“Virusun adını müəyyənləşdirmək üçün ilk növbədə test olunmalıdır. TƏBİB və Səhiyyə nazirliyi hansı virusun yayılması barədə açıqlama verməlidir. Bu, qrip, koronovirus, koronovirusun başqa ştamları və ya digər respirator viruslar da ola bilər. Amma əhali arasında yayılan bu cür xəstəliyin dəqiq hansı virus ilə bağlı olduğunu bilmək üçün mütləq testlər aparılmalıdır. Testlərdən sonra artıq müəyyən oluna bilər ki, ölkədə hazırda hansı virus yayılıb. Qış mövsümündə bütün respirator infeksiyalar qrip, koronovirus, renovirus və digər xəstəlik yarada bilər. Hər bir insan immun sistemindən asılı olaraq xəstəliyi fərqli formada keçirə bilərlər”.
Həkim-terapevt Abbas Bağırov isə əlavə edib ki, hər il qış fəslində mövsümü xəstəliklərin ortaya çıxmasını müşahidə edirik:
“Bu dəfə də yuxarı tənəffüs yolları xəstəliklərinin artdığını görürük. Əvvəlki dövrlərdə yalnız qrip virusu haqqında düşünürdüksə, indi isə rotavirus, adenovirus, metapneumovirus, koronovirusun mutasiyaya uğramış daha zəif formaları müşahidə olunur və hər birinin özünəməxsus kliniki əlamətləri patoloji gedişata səbəb olurlar. Bəzilərində ikili yoluxma halları müşahidə olunsa da, Səhiyyə nazirliyinin verdiyi statistik məlumatlara görə, metapneumovirus Azərbaycanda müşahidə olunmayıb. O virus dünyada təşviş yaratmaqdadır.
Viruslardan qorunmaq yolu izolyasiya olunmaqdır. Yanaşı gedən xəstəliklər varsa, profilaktik müalicələr aparmaq lazımdır ki, immun sistemə təhdid yaratmasın. İmmunitetin davamlılığı bədənin dözümlülüyünü qoruyur. Əgər immun sistemdə zəifləmə varsa, həkimə müraciət olunmalıdır. Özbaşına evdə müalicə aparılmamalıdır. Allergik, diabet, ürək-qan damar sistemi, yuxarı və aşağı tənəffüs yollarının hər hansı bir xəstəlikəri olan şəxslər mütləq diqqətli olmalıdırlar. Ən mühüm faktor isə immun sistemin qorunmasıdır”.
Nəzrin Vahid
