Bir neçə gün əvvəl paytaxtın Binəqədi rayonu, Atatürk prospekti ilə Əcəmi Naxçıvani küçəsinin kəsişməsində yeni tikilən binanın yaxınlığındakı səki barədə məlumat yayılıb. Lakin ərazidəki problemlər təkcə səkinin natamam qalması ilə yekunlaşmır. Bu haqda bu gün, 18 dekabr tarixində Bakuplus.az ATV-yə istinadən məlumat verir.
Burada olan qeyri-yaşayış obyektlərinin baxımsız vəziyyətdə qalması bu yerləri narkomanların yuvasına çevirib. Yerli sakinlərin iddialarına görə, günün müxtəlif saatlarında narkomanlar bu əraziyə yığışır və öz çirkin niyyətlərini yerinə yetirirlər.
Səki ilə bağlı Binəqədi Rayon İcra Hakimiyyətindən məlumat verilib ki, onlar səkinin düzəldilməsi ilə bağlı sahibkara dəfələrlə yazılı, həm də şifahi formada xəbərdarlıq ediblər. Amma görünən odur ki, ortada hələ nəticə yoxdur.
Obyektdə narkomanların yığılması barədə Daxili İşlər Nazirliyinin əməkdaşı Nurlan Əliyev bildirib ki, vətəndaşların müraciətinə əsasən, polis əməkdaşları ərazidə nəzarət tədbirlərini gücləndiriblər və narkotik vasitələrinin istifadəsinə aid ləvazimatların ərazidən yığışdırılması ilə bağlı aidiyyəti şəxslərə tapşırıq verilib.
