Daxili İşlər Nazirliyinin (DİN) Kibercinayətkarlıqla Mübarizə Baş İdarəsi 80-ə yaxın vətəndaşın kartındakı vəsaitləri ələ keçirən şəxsləri saxlayıb. Bu haqda bu gün, 17 iyul tarixində Bakuplus.az DİN-in mətbuat xidmətinə istinadən məlumat verir.
Keçirilən əməliyyat tədbirləri nəticəsində internetdə vətəndaşların pullarını ələ keçirən Əhməd Məmmədov və Etibar Vəliyev saxlanılıblar. Araşdırma zamanı məlum olub ki, onlar vətəndaşların kart məlumatlarını ələ keçirmək məqsədilə müxtəlif markalı avtomobillərin şəkillərini və məlumatlarını özlərinə məxsus nəqliyyat vasitələri kimi təqdim edərək, həmin nəqliyyat vasitələrinin dəyərindən qat-qat ucuz qiymətə satılması barədə elan saytlarında məlumatlar yerləşdiriblər.
Daha sonra isə onlara zəng edən müştərilərlə satış qiyməti barədə razılığa gələrək alıcıların kart məlumatlarını əldə ediblər. Həmin şəxslərin pul vəsaitlərini “Card to card” üsulu ilə hesablarına köçürüblər.
Araşdırmalar zamanı saxlanılan şəxslərin 80-ə yaxın vətəndaşa maddi ziyan vurduqları məlum olub.
Faktlarla bağlı Baş İdarədə cinayət işi başlanılıb. Saxlanılan şəxslər həbs olunublar.
Həmin şəxslərin qanunsuz əməllərindən zərər çəkən başqa vətəndaşlar varsa, bu barədə polis orqanlarına məlumat verə bilərlər.
